متابعين خجلي على تويتر
متابعين خجلي على الفيسبوك
| |||||||
 |
| | LinkBack | أدوات الموضوع | انواع عرض الموضوع |
2 - 8 - 2012, 05:27 AM
| #1 | |||
| صعب المنال خجلي موهوب  |  روايه يوميات حبي وحبه , روايه يوميات حبي وحبه كاملة , تحميل روايه يوميات حبي وحبه
يوميات اخطها بقلمي .... و ادون مشاعري و احاسيسي لتبقى ذكرى لي و له ..... تحكي حبا عشناه و عشقناه يوميات يخطها القدر ..... يمد يده ليلعب بمصير حبنا تشهد لي و له............. تحكم بيننا و تروي حبنا لحظات غضب و قهر و غيره و حب ........ تنتهي بخيانه و تبدأ مره اخري بحب فهل يستمر ذلك الحب العذري ضد تيارات الغيره و الكره فهل لكم من فضول لقرائتها ...... للحكم عليها ...... ابدأ اول خيوط يومياتي .......... اتعمق بها و الفها ثم اتركها لتنفلت منى و اتدارك لفها اقدم لكم اول رواياتي .... مها بطلة قصتنا تنجبر على خطوبه من ولد صديق والدها .... شخصيه قويه تمشي كلامها على الكل ... بس توقف قوتها بمواجهة والدها........... واقفه عند المرايا تتامل شكلها كيف صار من كثر التفكير .... و السهر ...... تفكر العالم تطور و حنا بعدنا نتزوج على اختيار أمي و أبوي . ما أنسى أبدا اللحظة إلا حطم فيها أبوي كل أمالي و جبرني أوافق على زوج المستقبل. كنت أظن إن عندي حرية الاختيار .... بس الوالد الله هداه أجبرني ... تذكرت الا صار من اسبوع .... كانت في غرفتها تقرا روايه ... منسدحه على بطنها و تهز ريلها دخل عليها ابوها و امها ... فزت قاعده بسرعه .... استغربت من الزياره المفاجأه هذي ..... و شو لم امي مع ابوي في غرفتي ... قعد ابوي مقابل لسريري و امي بحذالي.... فتح لي موضوع الخطوبه .... ارتبكت ... و حسيت بالاحراج منه .... و بعدين سمعته يقول : أنا شفت انه مناسب لج .. و أعرفه من زمان ، ولد أجاويد و ما عليه كلام رديت عليه بتردد : بس يبى عطني فرصه أفكر : ليش فرصه . أنا موافق و خلاص و عطيتهم خبر ، و الخميس الياي ملجتج. و حبني فوق راسي و قال : الف مبروك طلع و أنا ما زلت أناظر ورآه و ما حسية بأمي إلا و هي تحضني و تبارك لي .... : ألف مبروك حبيبتي رديت و انا فيني غبنه : بس يمه أنا أبي أف -------------------------------------------------------------------------------- نقزت اول ما دخل عمي الميلس وراه وحده لابسه عباه و منزله راسها و تناظر الارض............ هي شو بلاها الا يقول الارض عايبتنها ............و ليش لابسه عباه و ما متعدله ... ليكون مغصوبه علي....... رفعت راسها تناظرني ........... اف على عينها لها جمال .................تناظرني بنظرات قهرتني و كاني مو عايبنها اصلا هي ما عيبتني ابد........... داشه علي بعبايتها و من غير مكياج ........... و سمره و شكلها رجعيه و متخلفه ..............و اول سؤال سألته لها : انت باي مرحله دراسيه رفعت حاجب واحد و حقرتني و ما ردت علي ... التفت لأبوها .... استفسر سر صمتها ....... : هي تدرس بالجامعه و ما باجي لها وايد و تتخرج فهد : ما شاء الله خريجه ............ما اعرف ليش قلت لها ........بس انا ما احب مرتي تشتغل ضاقت عينها وناظرتني بنظرات غضب ...... بس هم سكتت وما ردت علي الاب : ما عليك منها هي بس مستحيه ............و اذا انت ما تباها تشتغل كيفك انقهرت من ابوي .... عيل ليش ادرس و متعبه حالي عسب ايلس في البيت.........و الله احس افادي شاب ضو ... بس هم سكت ... مالت عليك ليش يقزني جي.... نشيت و ركض للباب و من غير ما اسلم .... فهد شو هي قليلة ادب حتى ما سلمت ................ و الله ما ارتحت لها ابد........وش هذي البلوه و اليوم الملجه..لازم اتصرف بسرعه فهد : يا عم شفت شو سوت بنتك ..... ركضت من غير سلام و لا كلام احس اني احرجته بس مو مشكله خل انحاش من هذي العايله : اسمحلي يا عم و الله اني ما ارتحت لها و انت تعرف من الحين نفترق احسن من بعدين ............ و بلاها هذي الزيجه...........................شفت نظرة الصدمه في عيونه ............. و الله غمضني ... بس هذي حياتي و لازم اتصرف بسرعه و اعلم امي و ابوي ما يتحكمون بحياتي مره ثانيه .......... انا ريال و اختار الا اباها .. مو هم يختارون و انت بس روح تزوج.....ياريت حلوه....؟؟؟؟؟؟؟؟؟؟؟ الله عليك يا فهد انت ريال و تنجبر .. ما تنلام مها.... ابو حمد تم ساكت و ما تكلم هو ما يلوم بنته لأنها طلعت من غير اذن لأنها مستحيه ... و ما تكلمت لما طلب منها تترك دراستها و تقعد في البيت ...... رغم انه حطم حلمها و بعد ما تكلمت و انا ايدته ........ و الله انه مو ريال و ما يسوى عليه بنتي ......... و هو يحمد ربه اني اجبرتها توافق و الا هي محد خذ رايها ......... و الله اني مستحي اروح لها و اخبرها ........... اف تقدمت ببطء الى الصاله و سمعت تعليقات مي و حمد على اختهم و شكلها حمد: و الله انه تخرع منج مي : بذمتج منو يطلع لخطيبه بهذا الشكل مها: انتوا ما يخصكم .... يبيني ياخذني جي ما يبي بالطقاق و اول ما شافت ابوها نشت بسرعه و راحت حضنته :يبى انت من صدقك ما تبيني اكمل دراسه و الله حرام عليكم ... عيل ليش ادرس و اتعب عمري....... حضني ابوي فتره و هو ساكت .. و انا مستغربه من ردت فعله ... يبى شو فيك قال : يمه كل شي قسمه و نصيب امي شهقت و حمد و مي بهتوا يطالعون ابوي ... و انا استغربت بعد ما حددوا كل شي يكنسل ليش هو لعبه يبى انا قلت من الاول ما اباه انتوا اجبرتوني .............. و طالع النتيجه و الله اني شفت دمعت ابوي ..........مو سهله عليه خطيبي يرفضني اول ما شافني وقبل الملجه بكم ساعه و الله انه غمضني لما قال سامحيني يمه قلته افا يبه الا ما يباك لا تصيح تبيه .... و الحمد الله الفكه منه لأني ما ارتحت له ابد بس يبه اوعدني انك تشاورني .......... عطني فرصه افكر و استخير ربي ضغط على ابوي بشويش و همس باذوني اوعدج يمه.... و الله اني مت فرح ما يهمني المعرس الف غيره بس المهم ان ابوي اقتنع اخيرا.................. لفيت لامي و حضنتها .......... يمه لا تزعلين انا فرحانه انه راح ما يهمني.......و عمر ما كان الزواج للجمال الزواج للأخلاق ................. و الله خلقني بسيطة الجمال بس نعم علي بالأخلاق الحسنه .... تربيتج يمه حمد: الله ياخذه صدق ما يستاهل ..... عيل احد يرفض وحده عنها جمال عينج و الا ابتسامتج الا تطير العقل مها: اخيرا اعترفت انى احلى وحده بالبيت مي: شو قصدقج اني ما حلوه حمد: وع عليكم انا بس اجامل.... محد يعطيهم ويه ...يالله باي .................................................. ................................... .................................................. ......................... ام فهد: هلا يمه ....... ها شو العروس فهد و هو يمد بوزه : يمه بالله عليش هذي حلوه الحين : شو فيها ما شاء الله عليها جمال و دلال و اخلاق فهد: كله يمه الا الاخلاق و الله انها زفت .... و ما سلمت علي ..... ضحكت امه و ابوه عليه : الله هداك يمه تستحي فهد: يمه انت كيف تخطبينها حقي و الله انها مو حلوه و اخلاقها شينه و غده و ما ارتحت لها ابد ابو فهد: عن الكلام الزايد بنات بو حمد ما عليهم غبار..... و اليوم بتملج و بشوفها عدل و تقعد معاها و تتفاهم فهد : لا يبه خلاص انا كنسلت كل شي............... لغيت الخطبه نكز ابو فهد على طول : انت كيف اسوي جي من غير ما اشاورني فهد يوقف: و انتوا احد شاورني لما خطبتوا لي ابوا فهد : حسبي الله عليك من ولد ........ فضحتني.................. الحين لازم اكنسل كل شي ....... وطلع معصب و انا و لا علي ... امي تخزني بنظرات كلها لوم و عتاب بس تمت ساكته ... بس هذي النشبه شموه منو يفكني منها شمو: انت الحين من صدقك ما عيبتك مها وع اسمها مها و هي سبال ........... ما رديت عليها حقرتها : شوف عاد هي صح سمره بس لها جمال و............. بس عاد ما ابي اسمع شي انت فاهمه ...صرخت عليها بصوت عالي و طنشتها و طلعت ................. و الله حاله أي جمال انا ما شفت شي حلو فيها من الله توي ياي من برا و شايف اشكال الحريم كلهم ............. بس خلاص افتكيت من السالفه الحين اضمن ان محد راح يكلمني في موضوع زواجي نهاية الجزء الاول الجزء الثاني اوف يا هي حاله ..... مرة سنه على الخطبه و أمي مو راضيه تسكت ، كل مره تنغزني بالاكلام و الا الاب العزيز لين الحين احسه بارد و مجافني .انزين انا البنت مو عايبتني .............. مو حلوه ...... تنهدة بصوت عالي و انا اعدل الحمدانيه ، يالله خل انزل قبل لا اتاخر, اليوم عندنا متدربات من الجامعه ، و هذي اول مره الشركه تستقبل متدربات و لازم نهتم فيهم .............. نازل و انا ادندن ، حسيت بحركه عند نهاية الدرج، ما حطيت في بالي كملت طريجي و الا الاخت العزيزه تنط في ويهي و تصارخ، حسبي الله عليها خرعتني.... و انا كردة فعل سريعه نقزت لورا و ثبت عمري.. شموه: ههههههههههههههههههههههه خرعتك كل يوم نفس الحركه و ما تتعلم فهد: الله ياخذ بليسج .......... انت ما تعقلين............... و ليش انشاء الله مش مداومه تحيس بوزها: اف مليت، زوجوني و فكوني من هذي الدراسه مسكتها من شعرها : انت ما تستحين، بنات اخر زمن أمي: ما عليك منها عياره ....... و لا ستين واحد خطبها و هي ترفض تنافخ و ترد: شو اسوي اخاف لما يشوفني يشرد رفعت لها حاجب واحد ........... بدت الاخت تنغيز...... امي: ما عليج مو كل الريايل مثل اخوج : يمه انت سمعتي الاشاعه الا طلعت........... سكت شوي اشوف ردة فعل اخوي و بعد كملت انها مو حلوه و شينه و مو متحضره .......... ليش اطالعني جي مو هذا الكلام الا انت روجته عنها. فهد: و انت ليش معصبه .... انت احلى منها بوايد نقزت بقوه معصبه و تصارخ: لا و الله و انا اش عرفني انه مو مغصوب شراتك و يتلكك و يطلع حرته فيني خذت نفس شوي ..................... انا مو خبله تنرد لي حومة مهووووووووووو............طنشتني وراحت ركض غرفتها .................... و الله ان البنات معطيهم ويه............. هذي كل يوم نفس القصه تتكرر لدرجة اني حفظت شو بتقول قبل لا تقوله .......... بست راس امي و طلعت ............. عكرة مزاجي هذي الشموه................ .+++++++++++++++++++++++++++++++++++++++++++++++++ + -------------------------------------------------------------------------------- انا و البنات في السيارتي اليديده ..... سايرين الشركه الا لازم نتدرب فيها عسب مشروع التخرج........... و الله انصدمت لما قالي ابوي انها شركته و ممكن اتلاقى وياه........... خلج قويه و لا كأنج تعرفينه او يعني لج شي.........الله هداه ابوي ... اصلا هو ما همني و الحمد الله الله رحمني من خطبته ... بس الكلام الا انقال عني بعدها قهرني....................؟؟؟؟؟؟؟؟؟؟؟؟؟؟؟؟؟........ .. بركنت السياره و نزلنا... و كل وحده تعدل من شيلتها و اثبت النظاره الشمسيه... و العباه الا تطير مبينه بدلاتنا..... احس شكلنا فريه............هههههههههههههههههه. استقبلونا بكل ترحاب و خذونا في جوله بالشركه كلها لما يوصل المدير عسب يوزع الشغل من بيناتنا........ وصل فهد الشركه مع البنات و شافهم و هو يقول من خاطره هذولا البنات مو ذيج المتخلفه ... صعد فوق لأبوه يسلم عليه .... شاف العم بو حمد في ويه ... سلم و رحب فيه ... و ابو حمد ما زال شال من خاطره على فهد ...ما عطاه سالفه وايد....... الحمد الله و الشكر بلاهم هذولا خطبه و انفكت ما صار شي.......... كمل طريقه لأبوه يستفسر سبب الزياره بوفهد: بوحمد يقول ان وحده من بناته ضمن بنات الجامعه الا بيتدربون هني ............ و ياي يتاكد انك ما راح تغلس عليها. من زينها ......فهد : يبه الله هداك الشغل شغل ....... و انت تعرفني زين في الشغل ما افرق بين اختي و اخوي... بوفهد: يالله عيل, روح استلمهم ..... طلع فهد من عند ابوه و هو فيه قهر من بو حمد.................اول ما وصل لقسمه سمع صوت البنات و حشرتهم .... تذكر ايام الجامعه و شلته ....تنهد و الله زمان..نفخ صدره و عدل من الحمدانيه و دخل يتحمحم فهد: السلام عليكم........................... و بدا يشرح لهم عن طبيعة الشغل الا راح يستلمونه انتوا خمس بنات راح تستلمون خمس اقسام مختلفه لمدة 3 اسابيع و بعدين تبدلون الاقسام....يعني على نهاية فترة التدريب راح تكون كل وحده ماره على خمس اقسام مختلفه و ماخذه افكار و مهارات متعدده...............سكت شوي يشوف ردة فعلهم ...........اي سؤال..... و الله انه هو مستحيل انسى شكله و الا نبرة صوته ......... مالت عليه عباله شخصيه............ و الله انه كريه توزعنا كل وحده بقسم و الحمد الله اني بقسم بعيد عنه ......... اف الله فكني منه........ فهد: انسه تفضلي هذا قسمج و هذا الاخ خالد راح يكون المسؤول المباشر لج خلال 3 اسابيع ابتسمت بود في ويه خالد.......... و الله انه استحى و احس ويه استوى احمر ... بغيت انقع ضحك بس مسكت عمري... قلت بصوت رقيق متعمده : كيف حالك استاذ خالد ......... معاك مها......و البنات فضحوني يبان من حركتي اني ناويه على شي قاعدين تناغزون و يساسرون .............. الله يغربلهم جدام فهود الحين بيقول صايعه... من قالت مها رفعت راسي اطالعها .............. يمكن هذي بنت بو حمد ؟؟؟؟؟؟؟ لا ما اضن هذي شكلها غير و عليها ابتسامه تاخذ الروح و الله احس خالد استحى منها و هي تكلمه بهذي الطريقه غير ربعها يعلقون عليها .. : لو سمحتي اخت ............... متعمد ما اقول اسمها ............... وقت الشغل شغل و بلاها هذي الحركات... شهقت : تكلمني انا ........... وهذا ما سويت شي ......... وبصوت ارق حرام عليك...... و الله اني شفت نظرة قهر من عينه قبل لا يطلع و يكمل الجوله ...................حصووووه وويع ليش تتغامزون علي : الله ياخذج نعرف اسلوب الدلع مالتج وراج شي على شو ناويه : انا حرام عليج................ بس بغيت اقهر فهووود...........تطالعني بنظره ..............بس كيفي و لا تساليني زود..............؟؟؟؟؟؟؟؟؟ اليوم كان متعب و انكرفنا كرف .......... كانهم ما صدقوا احد يي يساعدهم شوي.......... طلعنا و حنا هلكانين... اول ما وصلت البيت استقبلتني مي.: ها بشري شفتيه طالعتها بنظره و حقرتها................تقهر الا يقول انا ميته فيه .... مالت عليه و الله انه ما يهمني :مهووووو و الصمخ ليش تحقريني.........طاع هذي اول يوم جي عيل بعد اسبوع كيف طالعتها مستغربه شو تخرف هذي: ميوووو مو رايقه لج : و الله انه غلبج من اول يوم ...........افا..................... و الله يا ميووو اذا ما سكتي لا ييج بكس على ويهج ....... و اقلدها غلبج اونه .......... اذا هو ما يعرفني كيف يغلبني....... و اهزها براسها و سرت عنها وو الا بويهي العله الثانيه ..........سكت و كملت طريجي للغرفه .......... و الا حمادووووو : حو انت ... شو سويتي ويا الا ما يسمى ........... طنشت و كملت طريجي ........يهز راسه و يقول افا غلبج ........وقفت اخذ نفس ... هذولا شو فيهم علي اليوم .......لفيت لهم و الشرار يطاير من عيني : انتوا بلاكم و الله الريال ما يعرفني و اذا سمعت احد فيكم يايب سيرته لأفلعه ........... و اصرخ فاهمين..... حمد : و الله و ادافع بعد ...شفتها تشل نعالها و تبي تفرني و الا اصارخ لايحوشك و انحاش برا الحوش و تلحقني ميووووو و قعدنا انلف حول النخله الا في الحوي و مها شاله لنا النعال و تصارخ و قامت اتخورها مره نعال و مره حصى ... قلت خل اشرد برا البيت احسن ....... مي : حمدوووو و يهد تنحاش و تخليني معاها و الله ما اكلمك........... مها حبيبتي و الله ما كان قصدي ..... انزين انتي ليش معصبه ........ و الا اشوفها شاله حصى تبي تفرني ............ و اركض احضنها مال قوووو و اسوي عمر ي اصيح ............... اسفه زين .... تبين تفلعيني يالظالمه..........سمعت تنهيدتها ........ ابتسمت قلت الحمد الله مها: اخر مره تفهمين ........... و عن العياره اسوين عمرج اصحين........... لا تحضنيني .. ما احب مي: اول قولي و الله ما تضربيني مها سكتت شوي و بعدين حلفت و دزتها و سارت غرفتها تبي ترتاح...................... ++++++++++++++++++++++++++++++++++++++++++ أمي : هلا يمه ............. ها بشر فهد و هو يقعد و يتساند بجنب امه .........خير يمه : شفتها عيل شو رايك فيها فهد يرفع حاجب واحد و يقول منو هي يمه :بنت بو حمد ............ ابوك يقول انها معاك في الشركه فهد: لا اله الا الله ......و بعدين يمه ............ و الله اني ما اعرف أي وحده فيهم ........ كانت بتقاطعه بس هو اشر لها و قالت بس يمه انتهى الموضوع ......... وسار بسرعه الى غرفته قبل لا تيي العله شموووه منو يفكني من لسانها...........................انسدحت على السرير افكر ليش كلهم مهتمين بهذي البنت.... شو فيها زود.... تنهدت بصوت عالى .......... :بسم الله عليك من الاه........ هذا اول يوم و تتنهد جي عيل لما تعرفها زين شو بسوي.. .التفت لها ....شمو يوزي عني...........شو رايج اني ما اعرف أي بنت منهم....... و انتوا ليش مهتمين فيها شموووو: لأنك ظلمتها .......... ما تباها قول ما اباها قبل فتره مو بيوم الملجه و تفضحها............نحن لو خطبناها لأحمد اخوك احسن : خلاص اكواا ياي بعد كم يوم روحوا اخطبوها له :ههههه تنكت .................. انت تعرف انه خلاص ما في امل :عيل انجبي و روحي برا خليني ارتاح......... اليوم هلكت من الشغل شهقت شموووو : ليكون كرفتها................... اكيد كرفتها غير ما اعلم لك ابوي صرخت شمووووو براااااا................................... وي بسم الله خل اشرد احسن لي ............. طليت براسي من الباب مره ثانيه و قلت عدال .......... ما كملت كلامي و الا المخده على راسي ......... صحت و الله اخبر عليك ابوي........................................رحت لأمي اشتكي............ ضحكت عليها ياهل منو راح ياخذها ........صدق الله يعينه........ .............................. نهاية الجزء الثاني ***************** مها: شموووو و يهد قلتج سكري الموضوع و الا راح افرج من الشباك هذا...............تعالي ابليني اذا ييت بيتكم شمووو: و الله لا اذبحج يالزفته ....... عزيمتي و ما تيين........... و اوعدج ما راح اييب سيرت اخوي المحترم بس اممممممممممممم سؤال واحد بس الله يخليج مها و هي معصبه: قولي ................. شموو: شو سويتي لما شفتيه .............. و الله و الله انج تجاوبيني...........لو تعزيني مهوووو و قعدت ابوسها بخدها بقوو .......... اعرف انها ما تحب هذي الحركه ........... دزتني بقوه و هي تصارخ : وع عليج لوعتي بجبدي ...راح اتكلم بس خوزي.................... ناظرتها و كلي براءه مستعده اسمع شو راح تحكي : امممممممم تعرفين يوم ابي اقهر احد شو اسوي .................. تقاطعني شموووو : ان شاء الله تدلعتي بالرمسه ..... هزيت راسي بأي... كملت شموو:.مالت عليج اخوي ما يحب احد يدلع عليه مها : و هذا الا انا اباه اقهره شمووو: انت اونج مو مهتمه و اخرتها تبين تقهريه................ مها: و الله يا شمووو من شفته يرمس بغرور و شايف عمره على الفاضي قلت خل اتسلى شو........... عصبت شمووو: و انت ما تتسلين الا باخوي ......... مهووو بطلي حركاتج الا كنا اسويها حق الاساتذه هذا اخوي ما ارضى عليه : وانا ما قلت شي بس اذا تحرش فيني ما راح اسكت له .............. و اش و لا كلمه فهمتي..... شموووو وهي نازله من الدري: مالت عليج و عليه كل اسكتوني من زينكم بدخلت حمد البيت يشوفها و هي نازله و تتحرطم مسك قلبه و قال بصوت عالي: منو مزعل القمر الا عندنا.... تيي مي ركض: منو القمر اكيد انا ... يدزها حمد: روحي لاه ...شوفي القمر الا هناك ميووو: هذي شمووو .................. وين يتها الحلاه انا احلى... و انت ما تستحي تناظر البنت ... تعال داخل بسرعه... لا اعلم عليك ابوي شمووو و هي منحرجه من حمد و تنغز مها علشان تساعدها..... مها و لا عليها.. وهي تتغطى و تساسر مهوو اراويج يالدبه .... باي اكيد ابوي برع الحين ++++++++++++++++++++ و بعد يومين كنا بالكفتيريا نتغدا .. مها: .واو اصدقون بنات خالد شخصيه و مأدب وماكو احلى عنه... حصوووه: هي انت بس لأحد يسمعج.. قاطعتها و الله انه خلود مادب وما يرمسني الا في الشغل و انا تعرفيني ما اعرف اسكت الا اتحرطم و و اسولف و هو وحليله يسمعني و مطول باله معاي..... فاطمه: مهو يوزي عن الريال : انتوا شو فيكم افكاركم سوده اقولكم مؤدب.........حصوووه تنغزني بخاصرتي و انا الغبيه مو منتبه لها ابد و قاعده امدح في الريال... لما سمعت صوت السلام عليكم............ و الله اني ارتبكت و بلعت ريقي اكيد سمعني و انا امدح بالريال ..زين كملة صورتي بنظره... اساندت على الكرسي و لا رديت السلام و البنات يعزمنه على الغدا و هو يرفض بكل ادب............ و الا الأدب الا مقطع بعضه.. قلت بكل دلع : مومعقوله استاذ تيي عندنا و ما تتغدا.... و الله شفت عينه لما ضاقت بس هم رفض بأدب.....و ستأذن وسار.... فطوم: انت معروفه حركاتج شو عليج من الريال ... قلنا الاساتذه و نقهرهم بدلعنا بس هو انت ما تعرفينه نرفزوني و سكت وما رديت عليهم ................ .................................................. .................................................. .................. كنت ما عطنهم ظهري بس صوتهم واصلني ....... و الله هذيك البنت تقهر و ع على دلعها ..لو كانت بمستوى جمال صديقاتها شو سوت.... و تتغزل بخالد ...... حسبي الله عليهم من بنات ما يخلون الواحد في حاله...... فهد: اقول خالد شو المتدربه معاك خالد يهز كتوفه : عادي ............. الله عليها ما تسكت ... كثر ما ترمس ما عدت اسمع اغاني بالمكتب هي مسلتني :خالد نصيحه منى البنت دلوعه و مطيحه المتانه...... خل العلاقه بينكم رسميه............. و الله توي سامعنها تناديك خلود و خلودي...... خالد يضحك: خلها و انا محصل حد يدلعني..................... و الله انقهرت منه معرس و عنده بنت و عايبتنه المسخره هذي ...رفعت صبعي في ويه و حذرته مره ثانيه :انا ما أحب هذي الحركات في مكاتب شركتي انت فاهم خالد: أي انت وين راح فكرك .......... انا ترا متزوج و احب زوجتي.... وهذي الا ..!!! فهد نش من الطاوله و هو منقهر من خالد .............. انا اعرفك زين ما كو داعي تبرر لي ......و اذا واثق فيك فأنا ما اثق فيها ................حط في بالك انك تعلمها احترامها لرئيسها قبل أي شي ثاني ........ خالد: لا تشيل هم تعال كمل غداك فهد : سديتوا نفسي................. سرت الى المصعد و الا بشلة الأنس واقفة المصعد........ وصلني صوتها و هي تقول: مكان فطيم يخرع كله شباب الا يقول داخله ديوانية شباب فطيم : انت الزين يعني .....بروحج مع خلود.......... تقلد مها لما تقول خلود مها تضحك بصوت عالي و تضرب فطيم على كتفها:هههههههههههههههههههه حلوه... بس خلودي مادب و محترم .............. ياي عليه شخصيه.............و كأنها حست باحد وراها صدت ناحيتي و الابتسامه مازالت على ويها .... و بهتت فيني اطالعني مسغربه قربي منها.... و عيني في عينها ............ و الله اربكتني ابتسامتها و الا اعيونها رغم النظارات الا أني ما قدرت اشل عيوني من عليها......صدق و الله عيون المها.....ما حسينا بالى حولنا الا بصوت المصعد لما وصل ....سحبتها ربيعتها و دخلوا.. و انا تميت واقف مكاني ما تحركت خفت ادخل معاها و ما اتحكم بعمري ....رديت عند خالد الا استغرب رجعتي ..... رفعت راسي و قلته و انا اقلد مها خلودي و الا يرحم والديك اسكت.............................!!!!!!!!!!!!! تم يطالعني فتره و بعدين نقع ضحك.... و انا معاه..... .................................................. .................................................. .................. حصووووه: مها ما تسوى علينا هذي الكم نظره الا تبادلتوها و انتي ساكته ما ترمسين فطيم: خليها تدلع عليه زياده علشان اخرتها تندم عزه: صدق و الله انها بهتت فيه مال عدل ................ تخبط راس مها و تقولها هي انت ليكون تحبينه ...او تقربين صوبه ...... ترا هو محجوز حقي..... حصوووه: غزوه خل مها تركز على السواقه.... مسودة الويه مو كأنج مخطوبه مها: عمري ما تخيلت اني راح انحط في هذا الموقف ......و الله العظيم لولا وجودكم جان صحت .... و تتنهد بصوت عالي و تقول انتوا ما تعرفون منو هذا ......................و انا ما بهت فيه على قولتكم من جماله .... لا انا استغربت وجوده جدامي و قربه منى بهذي الطريقه.......... و الله اني كنت متفاجأة...... و تضرب السكان بأيدها بقهر..... اما البنات اسغربوا منها و من ردت فعلها و فضلوا الصمت و لايعصبون فيها و هي اسوق...... الا يميز علاق البنات انهم في نفس الحي و هم اصدقاء من الصغر يعني كل وحده تعرف صديقتها شو تحب و شو تكره .... اما شمو و عليا و ندى يسكنون بنفس المنطقه بس بالجه الثانيه و كلهم ربع من الابتدائيه الى ما وصلوا للهذي المرحله...............قلوبهم على بعض و كل وحده تحب الثانيه و تخاف عليها.... مها و هي تنزل من سياراتها تستقبلها مي مثل العاده بالف سين و جيم ... مها خلاص واصله حدها من الهذي البلوه ميووو............. وقفت تطالعها بكل هدوء و تاخذ نفس ............ مي: بسم الله يتها الحاله باي.................. و ما اشوف الا غبارها ..... و الله هذي المي مخبله فيني و هي بلسم للجروح ... رغم اني ساعات ما اتقبلها ابد........... بس هي بعد اختي حبيبتي .....سرت غرفتي و رقدت من غير ما ابدل ملابسي .........................من التعب ما صحيت الا على اذان المغرب .... بنفس حلوه و بشوش رحت عند الوالده الله يحفظها احس من زمان عنها..................نظرات امي ما تريحني ابد....... و الله اعرف شو وراها ..... اكيد معرس مها: ها يمه شو الاخبار ام مها: الله يسلمج يمه .... متى افرح فيج و اشوف عيالج............. شفتوا قلتكم السالفه فيها معرس......... يمه منو هذي المره ........... اعرفه الام: هي حبيبتي ولد خالتج امنه مها: منو محمد ........... يمه الله هداج كم مره اقولكم هو بحسبت اخوي ................. وبعد الوالد المره الا طافت رفض عسب شكه انه اخوي بالرضاعه............ : ابوج ما يباج الا لواحد ........ وراح يرفض كل الا تقدموا لج بس علشانه ..........................بصراحه تفاجأة من كلام امايه ........ ابوي قام يشاورني بكل خطبه عسب الا استوى .......... منو في بال ابوي ............ شكل الوالده محتره اني رفضت ولد اختها ........... قامت تعق خيط و خيط.......... ++++++++++++++++++++++++++++++++++++++ شموو: وش عليه الاخ مستانس و مرتاح و اربيعتي هلكانه من ترد البيت ترقد ما تنش الا على المغرب ............ قزيتها بنظره يعني انجبي............... بس منو قال هذي شمووو.....................يخي حرام عليك شوي شوي على البنات ............... شو ما عيبنك كلامي .............. كلهم ربعي و نحن شله وحده فهد يتساند زين و يسألها : يعني انت كنت معاهم في الجامعه ............. اطالعني بنظرات و تقول اسمع هذا .... اذا انا راس الفساد هناك.......... ما اشوفهم هادين و الله لو كنت معاهم راح تطردنا من اول يوم : وانت اتقولين فيها ....... اذا هم جي مو فساد عيل يوم انت معاهم شو يستوي.......... تتخصر و ترد شو قصدك.. و الله نحن مشاغبات صح بس كل وحده اادب من الثانيه............. .رديت عليها منفعل شوي : من صدقج انت ... عيل الا تتغزل في خلودي و الا تتمصع في الكلام شو هذا اسميه :. ههههههههههههههه قول انك منقهر ............ بس انت بعدك ما تعودت عليهم هذي كلها سوالف بس.... ما عيبني كلامها ابد ............ اذا جي تعتبره سوالف عيل شو الجد عندهم................. شمووو: اسمع فهد لا تخبر احد انك اخوي الله يخليك .......... استغربت منها ... ليش يعني .... هزت كتفها و قالت جي .............و ما اباك تظهر في حفلتي ابد ............. بليز...حياتي ..... اوكي ...... و انا ساكت ما رديت عليها شفتها تهجم علي و تبوسني ....... دزيتها : قومي عني لأكفخج ................. شمووو: هههههههههههههههههه اول اوعدني انك ما تخبر احد....................... و الا ابوسك فهد : لا لا تقربين صوبي لأدوسج ببطنج.................. خلاص ما راح اخبر احد ........ اصلا يالذكيه انا علاقتي فيهم بحدود الشغل بس............... شمووو: و هي سايره عند امي .. تعرف رغم كرهك لمها و هي تكرهك الا انتوا متشابهين في أشياء و ايده... مغرورين و شايفين عمركم و لا بعد ما تحبون التلزق و البوس................ طرخ المخده فوق راسها :و الله اعلم عليك امي كل مره تطقني ................. يمااااااااه ... فهد: احسن علشان تتادبين يوم ترمسين معاي ......................انا سيرتها ما اطيقها بعد تقارني فيها ... بس لليوم ما اعرف أي وحده هي ........ انا حاس فيها بس اكابر ما ابي شكوكي تطلع صح ....... بس اذا شفت عينها اكيد راح اعرفها .......................الواحد وين يقدر ينسى و هذي العله شمووو فوق راسه .... شكلي لازم اخطب حد ثاني عسب تفك عني .............ما كأنهم تأخروا بالعشا فهد: يمه وين العشا ابي ارقد هلكان .................................... و ينتهي يوم من يوميات ابطالنا المصدر: منتديات خجلي - من قسم: قصص - قصص قصيره - روايات - قصص واقعية - روايات طويلة | |||
 |
|
| مواقع النشر (المفضلة) |
| |
المواضيع المتشابهه | ||||
| الموضوع | كاتب الموضوع | المنتدى | مشاركات | آخر مشاركة |
| رواية ام الجماجم وحب في المقابر , تحميل روايه ام الجماجم , روايه ام الجماجم كامله | صعب المنال | قصص - قصص قصيره - روايات - قصص واقعية - روايات طويلة | 4 | 1 - 2 - 2015 07:36 PM |
| روايه تعبت من الصبر وصبري طاب من الجروح , تحميل روايه تعبت من الصبر وصبري طاب من الجروح | صعب المنال | قصص - قصص قصيره - روايات - قصص واقعية - روايات طويلة | 0 | 11 - 7 - 2012 12:56 PM |
| تحميل روايه ناداني ولبيته كاملة , روايه ناداني ولبيته | صعب المنال | قصص - قصص قصيره - روايات - قصص واقعية - روايات طويلة | 1 | 28 - 6 - 2012 03:50 AM |
| روايه بسمة وخالد - تحميل روايه بسمة وخالد | صعب المنال | قصص - قصص قصيره - روايات - قصص واقعية - روايات طويلة | 0 | 19 - 6 - 2012 12:46 PM |
| يوميات بي بي | ٱڼـثے مڼ حـرﯾڔ♣ | نكت - ضحك - الغاز - وناسة - فرفشة - مواقف مضحكه | 2 | 21 - 9 - 2011 08:49 AM |
العرض العادي
