شعر عن الحقير

صعب المنال

ترفّعت عن رجا الأنذال همّتنا
ولو دهتنا الليالي ما أهمّتنا
وصروف الايام لو بالشر أَمّتنا
لا تعتقدنا نذلَّ لها ولو متنا
شعارنا الصبرُ والتفويض شيمتنا


ياما حلا المسرى بعيد عن الأنذال
في ليلتن يطربلها كل ساري
مسرا مع الفج الخلا عز وجلال
متشطرن ماخضت في عرض غاري
على خطات مشومرن يقطع اللال
تدفن مداهيله هبوب الذوراي
أجمع من البل عشر وتصير وبال
وأختر فحلها مع جنبها يباري
البل لها في مهجت القلب منزال
منايح القصار سفن الصحاري
مراجلن يشقابها كل رجال
أفلاس بايعها نواميس شاري
يكفيك ابن هندي ومسلط وهذال
ومن شمر العاصي وبرغش وضاري
لقيت في الوحده سكون وسعت بال
بعيد ماعندي من الهم طاري
ارجع الذكرا على روس الاجذال
وأمرح خلا بين الحجل والقماري
ماهمني جمع المرابي للاموال
عزيز لو امسيت جيعان عاري



ياصاحبي راسي من الفكر منداش
قامت عواصيف الطواري تسوقه

احاول ابَعّد عنه عنا الفكر وانحاش
أطرد سرابٍ ماحصل لي لحوقه

ولاشفت في دنياي مايبرد الجاش
تعبت من وقتٍ توسع فتوقه

الله من صبرٍ صبرته على ماش
ولا كل من يصبر يحصل حقوقه

البوم صار اليوم سعره ورى الكاش
والحر الاشقر خرب الوقت سوقه

حتى الثعالب قامت اليوم تهتاش
والذيب جنب والعشاء مايذوقه

هذا زمانٍ فيه الانذال تعتاش
واخس خلق الله يلحس شدوقه

هذا زمان الخبل والهيس والاش
والا الكفو صار الزمن ذا يسوقه

وياطول صبري بين حاقد وغشاش
ناسٍ على عرض المقفي شفوقه

أنت الخوي اللي على الهيب رشاش
نعم الرفيق اللي يعدّه رفيقه

لو ينفرش قلبي لك القلب مفراش
تجلس بوسطه والخدم حولك عروقه








إن كنت تنشد يارفيقي .. عن الحال
مالي على .. كتمانها عنك .. حيله

الصبر عن بوح الاحاسيس .. قتال
والبوح في بعض المواقف ، فشيله

لو كل مايطري على البال ينقال
ماكان شفت ان الثقيله .... ثقيله


ابطيت اكافح ضيقة البال بالبال
. وادفع بلاء .. هاجوسها كل .. ليله


لين اقبلت مثل .. السحابه بهمال
تشفي غليل اللي .. تزايد غليله


طاحت ، ولاْوفق من حناياك منزال
وابطلبك .. يابدر ( تكمى ) المخيله


ان قيل ترعد .. قلهم : صوت زلزال
وان قيل تبرق .. شف لها ادناة حيله


مابي .. تناقلها هل القيل والقال
.. وتصير من بعد القصيره .. طويله


يابدر .. ماني عال .. لو صحتي عال
.. شفني من الصدمات نفسي عليله


اشيل حملٍ .. لو يشيلنه .. جبال
.. الله ، وامانه .. غير تصبح نثيله


أرمي .. من هموم الزمن .. واسحب أدبال
وانزل عن ( الجوكر ) وغيري يشيله


من كثر ماشفت بحياتي من انذال ....!!
.. بديت اشك ان النذاله ... فضيله


ماطاح من عيني رجل ..!! طاحوا .. رجال
ورجال ( يابن حنيف ) ماهي قليله



اقرب من اللي قالهم ضمن ماقال .. :
راكان بن حثلين .. راعي الجزيله


( هذا .. ولد عمٍ ، وهذا .. ولد خال
وهذا .. رفيقٍ مالقينا .. بديله )


سبحان منهو يابدر غيّر الحال ..!!
. .. وحط الجفا بين الخليل .. وخليله


هذا الزمن يبغاله .. لسان دلاّل .. !
من يستحي هالوقت .. واعزتي له


وقتٍ به ( الراعي ) غدى .. راعي دلال
كلٍ على طاريه .. ينفض شليله ..!!



ومن كان ساسه للردى مضرب امثال
اليوم .. يحسب من كبار القبيله ..!!


المال .. يابن حنيف ملعون .. ابو المال
// .. ذل العزيز .. وعز .. ناسٍ ذليله ...!!

المصدر: منتديات خجلي - من قسم: شعر - قصائد - قصايد صوتيه - همس القوافي - قصائد الشعراء