اللي تشوفه يا أبيض الوجه سوه

طاح العتب .. ما هيب لحية مشاريه
خل الكلام .. و حبل الأعذار طوّه

ماراح اقول أشلون او كيف .. او ليه ؟
ترى السؤال بدون أجابه مشوّه

العذر ماات .. و مات همه و راعيه
و الجرح جف .. و جف غيمه ونوّه

صاحبك ضاع الهرج من بين أشافيه
ما كنّه اللي كان قبلك .. مفوّه

يجمع لك مِن الشعر فاخر معانيه
و يموت عندك قبل فيها يتفوّه

ليه أنصدم ؟ و تخون قلبي هقاويه
و يطيح نجمي .. و أنخذل في علوّه

أصدق مع الواحد و احبه .. و اثاريه
طووول الليالي معتبرني عدوّه

لايا بعدهم .. و أول الغيث تاليه
و أنت اتعرف قلبي .. و خيره وسوّه

يمكن لو انك قلت غلطان .. قلت ايه
مير البلا انك قلت .. ناقص مرّوه

قل لي متى شحيت في شي ٍ أعطيه
و قل لي متى صارت محبتك .. خوّه

يصعب على الرجال يثبت مباديه
و ان كانه اثبت .. كيف يثبت سموّه

الله يبيحك عن خطاك و تماديه
و يبيح قلبك عن خطاه وغلوّه

مادام حبك خالطه شك .. ما بيه
حب العتب و الشك .. ماعيش جوّه

ماكنّي اللي كل ما تلمس ايديه
يغمرك بأحساس و حنان الأبوّه

وما كني اللي كل ما مر طاريه
ضج الفضا باسمه .. و عكر هدوّه

يامرحبا بالجرح .. و الله يحييه
لا صار من يمناك و الجرح توّه

بعض الجروح ان صابت القلب تنهيه
و بعض الجروح .. تزوّد القلب قوّه

الله كتب .. و القوس في كف باريه

و اللي تشوفه يا أبيض الوجه .. سوّه

للشآعر / عبدآلله آلذوُيبآن ..