كلية البترجي
 

اخواني و اخواتي المستجدين بالكليه ,,,
هذي الخطوات اللي طلبوها مننا و اتمنى تفيدكم ,,
و أي عضو عنده معلومات لا يبخل علينا ,,,

1- تروح الكليه تشوفها بعينك و تلف فيها عشان تطمن شخصيا ..
2- تسأل طلاب الكليه اللي تثق فيهم انهم صادقين و مجتهدين لا تسأل الراسبين او اللعابين ..
3 - كذا انت اخذت فكره شامله الحين تبدأ بالتقديم ..
4 - صوره بطاقه الاحوال للسعودين و الاقامه و الجواز لغير السعوديين + كشف طبي تاخذ الاستماره من الكليه و تستكمل تعبئتها باقرب مستشفى اهلي او حكومي + تأمين طبي من عندهم ب 1600 او من بره + اصل شهاده الثانويه و القدرات طبعا اذا كنت مقبول بجامعه ثانيه و خايف يروح عليك القبول خلي الاصل عند الجامعه الاولى لين يجيك القبول في البترجي اسحب الاصل و سلمه لاكن في البدايه عطيهم صوره + صور شخصيه + تعبئه نموذج طلب الالتحاق بالكليه كتيب صغير تعبي فيه البيانات الشخصيه ..
5 - بعد استكمال الملف و الاوراق المطلوبه فيه تروح عندهم و معك ايصال ايداع بحسابهم مبلغ 3500 ريال و تقدمه في مكتب القبول و التسجيل عند مثنى الغامدي و احمد بترجي و محمد جوهر و عبدالباسط و مديرهم كلهم محمد عارف كلهم يخدموك لان هذي وظيفتهم الاساسيه ..
6- بعد ما تستلم رقمك الجامعي تروح لموقع وزاره التعليم العالي و تقدم عندهم على المنح الداخليه طبعا انتهى اتوقع التقديم يمكن يمددون الى 15 شوال لان العام مددو المنح الى نص شوال بس السنه هذي مدري ..
7- بعد ما تقدم على المنحه روح قدم على الموارد من نفس الكليه عند ايلاف او ليلى و كلهم الثنتين يبيعو كلام عشان كذا خليكم حريصين لما تستفسرو منهم و تاخذو الكلام ترى يضيعوكم بالكلام و كل واحد يقولو له كلام و الهدف يلخبطوكم فركزو معهم ..
8- بعدها تبدأ الدراسه 12 شوال قدامكم طريقين اما تداومو الين يردون عليكم المنحه او الموارد بالقبول وقتها ما تدفعو شي و تكملون و اذا درستو و ما جاكم القبول وقتها اما تدفعو و تكملو او تدفعو 10 الاف و تاخذو ملفاتكم عشان تسحبون و الطريق الثاني انكم تنتظر في بيوتكم لين يجي القبول او الرفض وقتها لما تسحب ما يطلب منكم ريال لانك اصلا ما درست ..
9 - اللبس من الكليه اللاب كوت يباع بالكليه ب 60 و بره الكليه من 40 الى 100 في بشارع حراء 3 محلات للملابس الطبيه و اما اللبس نفسه لكم حريه اللبس جينز او ثوب او تنوره على كيفكم اهم شي مراعاه اللبس الساتر يعني شورت لا او تنوره قصيره لا او فستان لا يعني تراعون اللبس الدراسي و البنات لهم حريه اللي تغطي او تكشف هذا بالفاست ..
10 - المواصلات الكليه لها باصات تجيب و ترجع من و الى السعودي الالماني ب 1500 السنه او ترم ناسي و اذا في قروب بنات يسون تخفيض الشركات حقت النقل ..
11 - السكن للبنات حلو و يمدحوه نوعا ما البنات اما الاولاد انصحهم يستأجرو بره نفس السعر و لك الحريه و اريح لان قسم الاولاد مدير السكن و اللي تحته مع احترامي لكم ( متخلفين )..
12 - البوفيه بالكليه ما في تطلع جنب الكليه في كل شي مشي او سياره و يمكن يفتحو السنه هذي مطاعم داخل الكليه لاني شفت تجهيزات بيفتحو مطاعم بس ما اعرف فتحو او لا ..
13 - المذكرات و البوكليت تاخذوه اما من الكوبي سنتر التصوير عنده ال 10 اوراق ب ريال او يوزعو عليكم سيديات و تعطونها شخص كفؤ يطبعها للكلاس كامل و يوزعها و تطلع تكلفه جميع المواد على الشخص تقريبا 43 ريال ..
14 - المذاكره اول باول اضمن لكم فوق ال 90 يعني لا تدخل بمذكره جديده الا و انت فاهم القلي قبلها كامله ..
15 - الدكاتره مثل العسل ودي اذكر اسماء بس من باب رد بعض الجميل لهم لاكن بيتغيرو او لا ما ادري ..
16 - اهم ما يبني لك المعدل اختبارات الفاينل و الشيك بوينت و بالاخص ماده البايو و الكمستري و الانجليش ..
17 - بتسمعووون اشاعات كثر شعر راسكم احسن نصيحه لكم اذن من طين و اذن من عجين لا تسمعو لاي اشاره سلبيه تحطمكم او تلخبط افكاركم ..
18 - اشعلو روح التحدي الشريف بتحسون بطعم الدراسه ..
19 - في قروبات للانشطه الطلابيه مثل نوبل برايز و سمو و ووووو انضمو اتفاعلو ناقشو طور نفسك قد ما تقدر ..
20 - الدوام من 8 ونص الى 3 ونص غالبا و لك باليوم 4 بصمات لازم وحده عند الدخول و عند بدايه و نهايه البريك و عند الخروج من الكليه المجموع 4 بناءا عليها يجيك الحرمان انتبهو ..



لكم فائق احتراامي
دمتم بود