نزعل ونتكبّر وحنا من الطين..
والكل منا صدّ لا أقبل خويّه.!

نفخر نقول إنا على الصد قاوين..
وهيّ علينا في الحقيقة قويه.!*

نشفق على الطيبة وكسب الكريمين..*
وهذي بنا لاشك فعلة رديه.!

ننسى نهايتنا وعلى وين ماشين..
وننسى الزمان اللي جمعنا سويه.!

المشكلة ماهي ب حاجة ل تخمين..
ولاهي بعد ياناس صعب القضيه.!

دق الرقم: كيفك.. هلا فيك.. وأهلين..
أنا الخوي اللي مزعّل خويه.

قلّه: تغيب وصورتك داخل العين..
ويبقى ل قدرك في خفوقي بقيه.

أخوان حنا لو يجي بيننا شين..
ومانفترق دام المعزه نديه.

خلك قوي لاتحتكرك الشياطين..
قبل الفوات وقبل وقت المنيه.

كلّم خويك ب اطيب الهرج واللين..
وأعرف جميل الهرج يمسح رديه.

هذي هي الدنيا من الحين ل الحين..
لابد بين الناس تحصل خطيه.

ومن لا يقدر غلطة أصحابه الحين..
يقرأ حروفي ويعتبرها هديه.

باكر تمر سنين وسنين وسنين..
والكل يرحل في الدروب المديه.

صدقني تندم وأذكر حروفنا زين..
على ابن عمك إذا غاب ضيّه.

دنيا غريبة وأكثر الناس ماشين..
وكم واحدٍ والله إدفنته يديه.