منتديات خجلي - يارب تجعله من النار منجات

قصيدة يارب تجعله عن النار منجات

ياهاجسي وإن جات في بدع الابيات
انا وجزل الشعر نحَسْب رفاقه
رفيقي اللي معْي في كل الاوقات
بيني وبينه ماتضيع العلاقه
علاقةً ماهي بمثل العلاقات
اغليه واشفق مع حروفه شفاقه
عزالله انه صاحبي طيّب الذات
لوكان بعض احيان مراً مذاقه
شعري خوي الجنب هيهات هيهات
مهديني احساسه وانا اهديه باقه
اسبح به بحور القصيد الغزيرات
واعلَمه كيف الوفاء باللباقه
ومادمت حي وشعري الحي مامات
لإرثي به اللي قد طواني فراقه
ابوي راع المرجله والمروات
تنشر له البيضاء على كل ساقه
ياما له امع الطيب صوله وجولات
وياما سنام المجد بالعز واقه
وياما كسْب كل العلوم الجزيلات
وياما يسوق العرف والعرف ساقه
يقدح ظفر يااهْل القلوب الخفيفات
قدحة سطر ماهي بقدحة حماقه
يعطي كرم يااهْل الكفوف البخيلات
يشهد له آلاقصين قبل الرفاقه
عاش بزمانه عيشة الذيب مابات
مابات جايع في الزمن وإصطفاقه
بين البداوه وآلامور المهمات
ياقف قويّ العظم مالان ساقه
طبع بدوياَ ضاريٍ بالقساوات
يَعصْب شماغه ويتقفّا نياقه
هذاك ابوي ولي مع الذكر وقفات
ذكره بصدري لو يزيد اختناقه
اعيش به في عالم الحزن لحظات
والمْ طيفه وآتخيل اعناقه
واحس به في داخل القلب نبضات
وقلبي على طاريه زاد احتراقه
مرحوم ياراع العلوم النقيات
يامن عشق درب المراجل إعشاقه
يارب تجعله عن النار منجات
يافارض الاسلام قبل اعتناقه

الله يرحمه ويغفر لولدي
اخوكم طلال العجمي