جيت المكان اللي قبل عام جيته

غندا

. . . . . . جيته أدوّر به بقايا حنينه

مدري وش اللي صار لكن فديته


. . . . . .قبل اقترب صوّت ياعا رفينه




سألت جاره قال هذاك بيته


. . . . . .قلت أسألك عن صاحب البيت وينه


قال العذر عامين ماذاع صيته


. . . . . . والله مدري وين راحت سنينه













وعوّدت هايم منقهر مالقيته


. . . . . . والهم زاد وزاد قلبي ونينه




تكسّر الخاطر مثل ماهقيته


. . . . . . مثل الزجاج وبالحجر حاذفينه


ياعاذلي كف العذل مانسيته


. . . . . . رافض نصايحكم ولوهي ثمينه


لوهي على كيفي شراعي طويته


. . . . . . وابعدت عن داره وشينه وزينه


ياعاذلي ياليتني ماهويته


. . . . . . ولا تكوّن حب بيني وبينه


ولا حلفت ومن عهودي عطيته


. . . . . . ولاعطاني خاتمه من يمينه


ولارجاني ثم بعده رجيته


. . . . . . ولا على صدره يدي في يدينه


ولا سقاني من هواه وسقيته


. . . . . . ليته جفاني او جفيته بحينه


ياما سهرت الليل ياما أحتريته


. . . . . . ياما على كفي نزل دمع عينه


ياما سألته وش حصل وأحتويته


. . . . . . حتى هدأ وأشرق بعيني جبينه


يالايمي قبلك خفوقي نهيته


. . . . . . عيّا يوافقني عسى الله يعينه

المصدر: منتديات خجلي - من قسم: شعر - قصائد - قصايد صوتيه - همس القوافي - قصائد الشعراء

زكريا الهادي

غندا

زكريا

صاحب الخطوات الجميلة
والبصمات المنيرة
لك كل الشكر والاحترام
على هذه الكلمات العطرة و المرور المميز
دمت بحفظ الرحمن